النهاردة الجمعة 28 يناير 2011
الكل بيجهزنفسه علشان يطلع ف مظاهرة جمعة الغضب
قبل الصلاة تلاقي الشوارع فاضية تماما كأن الناس بتطبق شعار اللي خايف علي نفسه يروح ...
طبعا ناتج 30 سنة رعب و خوف كان لازم يطلع ف ثانية...
اللي يتردد ف مجرد توقيع علي بيان يندد بالاستخدام المفرط للقوة من جانب الشرطة تجاه المتظاهرين ...
و اللي خاف من مجرد نسبة تهمة و عار و سبة تحريض الشباب اللي خرج يوم 25 يناير بشكل اكتر من محترم و حاول يقول انا ماليش دعوة ...
ف الوقت اللي خرج فيه أكتر من فنان و كان ف اول صف مش علشان يتصور و يروح و كفاية علينا كده احنا تعبنا ... لأ.
علشان يكمل دوره الحقيقي كمصري مش دوره قدام كاميرا كممثل مستني المخرج يقول له أكشن و فركش .
ايوة الناس اللي لسه عندها خوف كتير ...
بس الناس اللي اتعالجت كانوا أكتر.
ابتدي مشواري من بيتنا لمسجد الاستقامة بالجيزة .... وصلت بالمصادفة ف نفس لحظة وصول دكتور محمد البرادعي و ابراهيم عيسي للمسجد و طبعا المحاولات المعتادة لعدم مروره انتهت ف لحظة بكام كلمة حلوة للضباط و هتاف الشعب و الشرطة ف خدمة الوطن ....
وان كنت ماستريحتش من الشكل العام و حسيت ان في تمثيلية ما لكن المهم عدوا من الحواجز البشرية و كان انطباعي الاول ان دول مش ممكن ينضربوا قصاد الكاميرات و وسائل الاعلام اللي جاية تصور ... علشان كده طلعت علي جامع عمرو بن العاص ف مصر القديمة .
الجميل ان الكل كان حاسس ان في حاجة ح تحصل النهاردة ...
سواق الميكروباص اللي عمال يهزر مع الركاب و معايا شخصيا لما باقوله انا عايز اروح جامع عمرو و كاني باقوله نزلني تاني مظاهرة ع اليمين يا اسطي .
و أقابل المفاجأة التانية ان مافيش غير عسكري واحد مرور ف الطريق من صلاح سالم لحد الجامع ...
هو في ايه ؟
الشكل الحضاري لليوم الاول
و الصدامات اللي حصلت ف اليوم التاني
و المواجهات و الصمود اللي حصل ف اليوم الثالث
كل دا ح يروح هدر و لا ايه ؟
لكن و الحمد لله قبل ما أدخل الجامع لمحت علي بعد 200 متر عربية امن مركزي ...
ايوة كده ...
حسسوني ان الملايين اللي ح تطلع دي ح تلاقي حد يهتم بيها بدل الطناش اللي الحكومة بترد بيه علي الاحداث دي كلها ...
اتوضيت و قعدت اصلي ...
خطبة عن العدل و التسامح و كلام كتير مافهمتوش رغم اني متخرج من الجامعة من 8 سنين و متعلم القراية من 25 سنة ...
بس الخطيب يإما مش عارف يجمع يإما انا اللي فصلت منه ....
عادي جدا و هو يعني مين بيفهم خطبة الجمعة اليومين دول او يقدر يعرف موضوعها ...
مش هو كله كلام و بعدين نصلي و نمشي نروح نشوف اشغالنا ...
تدرج صوت الخطيب من العلو و للارتفاع للانخفاض مرة واحدة كأنه ح يخلص ... بعدين يعلا تاني و يتكرر دا اكتر من مرة خلاني اتيقن ان الراجل دا بيتكلم غصب عنه ...
او مش لاقي حاجة يقولها ... بس لازم يأخر الناس و خلاص ...
لحد ما وصل للدعاء
انت يا شيخ يا جليل عارف ان الناس دي طالعة تهتف ضد مبارك و جواها غضب و كراهية لكل شئ ف البلد ...
تقوم انت تدعي لمبارك ؟
طيب ازاي ؟
و هو انت اساسا من امتي كنت بتدعي لمبارك ؟
كان لازم يعني ؟
الناس بعد ما هو سلم ف الركعة التانية و هجموا عليه
لا ماحدش ضربه ...
حسبي الله و نعم الوكيل
دا الهتاف الجماعي اللي قعدوا يرددوه و الامام بمنتهي برود الاعصاب مش سامع منه غير كلمة واحدة
ماعلش
ما هو لو انت خايف علي نفسك و علي اكل عيشك كده يبقي كنت شوف لك اي حاجة تعملها بدل ماتكون خطيب مسجد بتربط بين الناس و الدين ...
ولا يعني هي جات عليك ...
ماهو كل الدعاة – او معظمهم عشان ماظلمش حد – بيعملوا زيك ...
شغلانة حلوة اوي انك تاخد قداسة و احترام الناس بصفتك حامل كتاب الله و اقوال رسوله و لما تواجههم مشكلة ف الحياة يجروا عليك و هما متأكدين ان الدين اللي بيعبدوه اكيد موجود فيه حل ...
علشان سعادتك تمارس بعض الغرور و التسلط و ف الاخر مافيش عندك اي حل لان سيادتك مش فاهم ... حافظ و مش فاهم ...
و ياريتك حافظ صح عشان تقول الاية اللي مكانها ف المشكلة دي ... مش اي كلام و خلاص ...
المهم الناس سابت الامام و ابتسامته الباردة لسة مرسومة علي وشه عشان يغادروا المسجد ...
الهتاف المعتاد اتقال بالمقلوب ...
بدل الشعب يرد اسقاط النظام كان الهتاف
اسقاط النظام الشعب يريد ...
مش مهم الكلام مش مترتب نبقي نرتبه بعدين
المهم نكمل ...
لبست جزمتي و انا متوقع مسيرة حاشدة تبدأ من المسجد لشارع صلاح سالم و تاخد اتجاه الجيزة لحد كوبري المنيل و سينما فاتن حمامة ثم تاخد شمال ف اتجاه ميدان التحرير وتقابل عند القصر العيني مظاهرة الجيزة و الجامعة اللي ح يجيبها البرادعي معاه ...
رائع ... و نعمل زي يوم الثلاثاء و تبقي مظاهرة سلمية مافيهاش اي خروج عن الادب
علي بركة الله
خرجت من الجامع و اتفاجئت ان الناس مشيت من غير هتاف و لا تجمع و لا حشد و لا اي شئ ...
علي فكرة في مظاهرة النهاردة ؟
حبيت افكر اي حد لكن مافيش ...
مافيش حد رد علي غير واحد ابتسم بسخرية بعدين راح انضم لمجموعة كده لابسين مدني بس لو لاحظت ح تلاقي شوية منهم لابسين كابات شبه بعض ...
مش كتير بس ح تقدر تلاحظ ...
بمنتهي الادب واحد منهم بيقول ليا ما تمشيش من الاتجاه دا ... اللي هو الطريق المؤدي لشارع صلاح سالم ... خصوصا لو معايا بنت ...
طبعا كان بيتكلم ليا و لراجل ماشي جنبي و ف ايده المدام .
كنت ح اسمع كلامه خصوصا و انا مش شايف حد ماشي و لا سامع هتاف ...
بس المدام و الراجل رجعوا من دخول الطريق الجانبي و اتجهوا للطريق المعتاد ...
وراهم ...
الحق اروح الجيزة او اطلع علي التحرير و اشوف الدنيا عاملة ايه هناك ...
يادوب هما 200 متر و لقيت الناس تجري لاي شارع جانبي و الدخان وراهم ...إطلاق القنابل ماجتجش الناس تهتف
الامن المركزي طبق اول نظرية اسلامية ف تعامله مع الشعب
انما الاعمال بالنيات
و ماداش فرصة لحد انه يعارض و يقول انا مش معاهم
لأ دا عمل كماشة من الجانبين
جريت لاني عارف الدخان دا و اثره ايه بالضبط من ايام انتفاضة الاقصي و انا لسه طالب جامعي 2001
لكن ماكنش في وقت لاجترار الذكريات و انا باقاتل عيني علشان اعرف انا ماشي ازاي ...
استقبلنا واحد معاه قزازة بيبسي و نصيحة مجربة ف تونس بغسل العينين علشان يضيع تأثير القنابل المسيلة للدموع ...
ماكنش في وقت عشان افكر او اقول الكلام دا صح و لا لا غير بالتجربة الفورية ...
و فعلا ثانية واحدة و قدرت افتح عيني تاني ...
مش ممكن
و لا كأن في حاجة اترمت ...
الله عليكم يا رجالة تونس
اشتريت اتنين كانز طبعا بسعر مبالغ فيه شوية بس الراجل البياع حب يستغل الفرصة و يزود جنيه علي كل حاجة فيها صودا بيبعها ....
من اولها كده ؟
مش مهم ... المهم اكمل طريقي ...
فعلا حبيت اخرج علي بره و انا تقريبا مش عارف ان كنت ماشي صح و لا غلط ...
واحدة عمالة تهتف و تحسبن و ماحدش بيرد عليها ...
لكن اول ما راجل هتف الناس رددت وراه ...
تفرقة عنصرية مش كده ؟؟ مش مهم
لاحظ اني ح اقول الكلمة دي كتير بس مش مهم ماتاخدش ف بالك ...
وصلت لشارع فاضي تماما لدرجة شكيت ان دا هو شارع صلاح سالم ... سألت الناس فواحد رد عليا أيوة ... قبل ما يجري علشان الضرب اشتغل تاني ....
و طبعا الذكاء المعتاد بتاع المصريين مش ح يكون اقل من بتوع تونس ...
كاوتشات بتولع علشان تشيل الدخان الابيض و ترفعه لفوق
و ف نفس الوقت تخوف بتوع الامن المركزي و ماتخليش حد يقرب منهم ...
دخلت ف منطقة شعبية مش عارف اسمها ايه ....
ست بتعيط و هي عمالة تنده علي ابنها و تترجاه ما يروحش ناحية الناس دي ...
و الاحساس جواها ان الحرب قامت خلاص ....
لا ياستي الحرب ماقامتش
بس عشان انتو طيبين و مافيش حد بيسأل فيكم مش ح يرحموكم الكام ساعة دول
ما هو لو كان في حد مشهور و معاه كاميرتين يتصور بيهم كانوا اتكسفوا و ماحدش اتعامل مع الناس دي بالشكل المهين دا .
الناس ماهتفتش و لا حتي اتجمعت ... يبقي الضرب لازمته ايه بقي ...
وصلت لامتداد شارع جامع عمرو و لاحظت ان صوت اطلاق القنابل ابتدي يصاحبه صوت طلقات متتالية ...
معقول دا رصاص ؟
و هنا ف المنطقة دي ؟
خش استخبي هنا لحد الضرب ما يهدي ...
دا واحد بيشاور ليا علشان أخش عنده البيت لحد م الضرب ما يهدي ...
فعلا دخلت و انا ماعرفوش ولا هو يعرفني ...
بس احساسي ان المصري اللي بجد بيبان وقت الشدة هو اللي خلاني اشكره و اخرج تاني بسرعة ...
فكرت اروح جامع عمرو اشوف الدنيا عاملة ايه ...
بس لقيت ان الطريق للتحرير اهم ...
خصوصا ان ف المنطقة دي مش ح تعرف تتصرف علشان حواليك ناس
بس واضح ان الامور دي مابقتش تفرق مع الامن المركزي .
مشيت تجاه سور مجري العيون واتجهت للكورنيش و طبعا اول ما وصلت فوق الكوبري اللي بيمر من تحته المترو شميت الريحة بتاعة القنابل اللي واضح ان الهوا بيشيلها من مكان لمكان .
يعني لو انت بعيد عن موقع و مكان ضربها ماتقلقش ...
ح تجيبلك لحد عندك ...
طريق الكورنيش و اتجاه القصر العيني و اول ماوصلت هناك لقيت اتنين جايين .
ايه الاخبار
الضرب شغال علي ودنه
يعني في ناس بتعدي؟
نظرة دهشة و تقريبا كانت بتقول هو انت مجنون علشان تروح هناك؟
ارجع يا عم بلاش عبط العمر مش بعزقة
ومين قالك انك تبقي ابن اخويا؟
سبته وكملت طريقي
لكن اول ما وصلت للقصر العيني الفرنساوي قلت لازم ارجع الكتب لمكتبة مبارك علشان ايدي ترتاح شوية من شيلتها وكمان علشان اعرف اجري براحتي ...
رحت المكتبة و الحمد لهه لقيتها اجازة بسبب توقعات المظاهرات ... او اي سبب يريحك علشان المكتبة تتقفل ف اليوم دا .
امن المكتبة واقف علي الطريق يهتف ف كل سواق عربية متجه ناحية الجلاء انه يقفل شباك العربية علشان القنابل
طبعا استغربت ان ممكن يكون في ضرب ف ميدان الجلاء
طيب و الاخوة الاجانب اللي ف الشيراتون ؟
مش خايفين من جرح شعورهم او اذيتهم ؟
طبعا ماكنتش مصدق ...
لكن هو من امتي و انا باصدق ؟
اشتريت لتر بيبسي و اتجهت ناحية ميدان الجلاء
و هناك لقيت الشباب بيصلوا و واقفين مش عارفين يعدوا كوبري الجلاء لميدان التحرير ...
واللي قافله تماما جنود الامن المركزي...
و ابتديت مرحلة جمع المعلومات ...
طبعا العبقري اللي قفل النت و الموبايلات ما يعرفش ان معظم الناس لما مش ح تلاقي معلومة قدامها ف البيت يبقي ح تنزل من البيت
وتتجمع
و يزيد العدد
كمان المعلومات بتنتشر اسرع من كافة التخيلات
علشان كل الناس بيبقي نفسها تعرف
و كل الناس نفسها تتكلم .
نرجع بقي للامن المركزي اللي قفل علي الناس و فرقهم بشكل يحاصر بيه كل التجمعات
يعني هو دلوقتي قافل علي الناس اللي ف التحرير بمجموعة منه محتله كوبري قصر النيل و ف نفس ذات الوقت هو قافل علي الناس اللي جايه من اتجاه الاوبرا و ف نفس الوقت اللي محاصر بيه التجمعات قدام الاوبرا و قافل و محاصر المجموعة اللي قدام الشيراتون ف ميدان الجلاء ف نفس الوقت اللي بيضرب بيه من الخلف ف تجمعات المهندسين و مسجد مصطفي محمود و شارع جامعة الدول العربية و قافل الطريق قدام الناس اللي جاية من عند امبابة و الكيت كات و رامي كام عسكري ف مطلع كوبري 6 اكتوبر .
حد فاهم حاجة
انا برضة وقتها مافهمتش
وقفت مع الناس اللي قدام الشيراتون و رائحة القنابل المسيلة للدموع لسه معبية المكان
و اندهاشي وصل لقمته
هما فعلا ضربوا هنا ؟
طيب ازاي؟
و الناس اللي ف الفندق من الاخوة الاجانب و العرب ؟
دا لما سمكة قرش هاجمت كام سائحة من روسيا الدنيا اتقلبت ...
يمكن ادوهم الجنسية المصرية علشان لو جرالهم حاجة زي ما بيحصل في القطارات اللي بتولع و بيموت فيها الالاف من المصريين يبقي هما كام ملطوش تعويض و انت و حظك...
يا تاخدهم ف جيبك يا تاخدهم علي وشك .او علي قفاك حسب مقدرتك الصحية .
الناس واقفة حواليا مش عارفين ياخدو قرار ...
ح نروح فين ؟
رأي اول:
خلينا مكانا هنا امان .
رأي ثان:
لأ نحاول نقتحم الكوبري
رأي ثالث:
نروح نخلص الاول المجموعة المحاصرة ف المهندسين او الكيت كات و نتجمع كلنا ونروح التحرير .
رأي رابع:
نروح بيوتنا و كفاية كدة .
رأي خامس ..
لازم اعرف ايه الي بيحصل ف التحرير .
ولأن رأيي لوحده يعتبر اغلبية فأنا و بمنتهي الديمقراطية كملت طريقي و سبت الاخوة اللي لسة بيتناقشوا عشان ياخدوا قرارهم .
خطتي بأختصار ان اعدي اي كوبري علي النيل غير كوبري قصر النيل .
خطة بسيطة جدا .
او هكذا كنت اعتقد .
الكوبري التالي هو كوبري اكتوبر .
اول ما وصلت عند مطلعه يعني عند شارع نوال استقبلتني شما و بصرا اثار معركة ضارية
ريحة القنابل كانت اوضح هنا و فوارغ الطلقات المطاطية مالية الارض
و الاخوة جنود الامن المركزي واقفين علي مطلع الكوبري بيطبقوا نظرية ان كان فيكم حد راجل يطلع لي فوق.
و طبعا معروف ايه اللي بيحصل للرجالة اللي بتطلع فوق ...
طيب اعمل ايه ؟
بقية مظاهرة جاية من ناحية الكيت كات و الناس فرحانة جدا بس بسؤال احد المتظاهرين اعرب سيادته عن غضبه الشديد لانهم قافلين كل الكباري وهو جاي .
طيب اعمل ايه ؟
فاكرين نظرية عمو يا عمو معاك شيكولاته؟
طيب باختصار طلعت السلم و بكل براءة استقبلت الوجوة البوليسية بأبتسامة ملائكية
ممكن اعدي لو سمحت؟
الضابط ابتسم و خلاني اعدي
عادي جدا
ما ايه الخطر من واحد لوحده؟
او يمكن ماهانش عليه يضيع عليا شرف اللي ح يحصل ليا بعد شوية .
المهم اني عديت بمنتهي البساطة .
و اتمشيت فوق الكوبري باتجاه التحرير
و طبعا الدخان اللي بيعلا قدامي بيخليني علي عكس المفروض يحصل بدل ما اخاف و ارجع اكمل لقدام.
صوت طلقات عالي جدا من اتجاه الاوبرا .
كذبت وداني لاني ماتخيلتش انهم ممكن يضبرا طلقات حقيقي ...
الصوت بيعلا كانه بيتحداني
يمكن ف الهوا ؟
جايز ف الهوا
اكيد ف الهوا ...
ربنا يستر
وصلت لحد منزل ميدان التحرير علي اليمين و علي اليسار التليفزيون المصري و ف الوسط تكملة الكوبري الي رمسيس و ...
اسف انا لسه ما وصلتش ...
اصل كان صعب جدا انك توصل و الكوبري مقفول من الجهتين و القنابل بتتحدف فوق و تحت لدرجة تخليك بتشك ف اللي ماشي جنبك ليطلع ليك قنبلة من جيبه و يحدفها عليك .
الناس جاية بتجري عليا كأنها بتهرب من الجحيم نفسه
و حالات الاختناق باين انها مش بس دليل علي اسلوب حقير من الامن علشان يسكت الناس
لا
كانت بالنسبة ليا دليل علي حال الشعب كله من النظام كله
افتكرت وجود الخل معايا
كنت عمال ادي كل الناس ف خل
كأني باوزع عطور مش مجرد خل
خصوصا البيبسي اللي كان معايا خلص تماما و انا عمال اغسل وشي بيه و ادي لناس تحس انها قربت خلاص تموت من الاختناق
ساعتها مش مهم دا مين و لا اسمه ايه
المهم انه مصري زيك و لازم تسعفه
الغريبة اني كنت باقرب شوية بشوية علشان الحق الناس اللي جاية مخنوقة من القنابل
و ماكنتش واخد بالي من اني باقرب اكتر غير لما لقيت قنبلة بتنفجر جنبي
و انا ف النص
معلومة صغيرة
انا عندي ضيق تنفس
تخيل انت بقي التأثير المضاعف عندي
اخر حاجة افتكرتها اني اقول الشهادتين و اخلص بقي
خصوصا وانا مش ح استحمل اكتم نفسي اكتر من كدة
حواسي كلها بتنفجر بسبب القنبلة دي
مش معقولة دي معمولة عشان بني ادمين
تأثيرها فعلا بشع
علي الرغم من اني افتكرت خلاص اني اتعودت عليها و اني ح استحملها بسبب الخل اللي عمال اشمه لدرجة اني ادمنت الخل...
و ابتدت الدنيا تروح
لكن فجأة حسيت بكام ايد بتسحبني بعيد و بيبسي بيترمي علي عيني و علي ايدي و الخل اللي انا ماسكة ف ايدي لقيته بيروح باكمله عشان يغسل مناخيري
ثواني و ابتدت الدنيا تروق واشوف
و هديت انفاسي
الحمد لله
انت بخير؟
اول كلمة سمعتها
و علي الرغم من اني كررتها لكل واحد كنت باديله اسعافات لكن ماحسيتهاش بالشكل اللي حسيته ساعتها و انا باسمعها من ناس ماعرفهمش
وقفت شوية و بصيت ورايا
ممكن ترجع وكفاية عليك كده
قبل ما افكر لقيت الرد
ح يحصل ايه اكتر من كده
قل لن يصيبنا الا ما كتب الله لنا
لازم انزل و اشوف ايه اللي بيحصل ف الميدان تحت
لما احنا فوق الكوبري و بيحصل لنا كده امال اللي ف الميدان نفسه بيعملوا فيهم ايه؟
خطة سريعة باستغلال دخان القنابل نفسه عشان استخبي وراه
و استغلال كمان ان في ناس كانت بتصلي المغلاب
المهم لقيت نفسي باعدي و بانزل سلم الكوبري ف اتجاه التليفزيون
اجري
الضرب تحت كان بمنتهي الكرم
كل ما تروح مكان تلاقي الضرب و ريحة القنابل اللي بتنتقل
